Javaneese Style

NGELINGI BANGSA TANI

Hei cah nom – noman piye kabare??, tinimbalan iki ora ateges bedake nanging manut pangerten psikologi nom- noman kuwi pawongan kang bergas, gagah prakoso, trengginas lan pinunjul beda karo wong tuwa kang luwih mantep lan anteng. Minurut ramalan ing mangsa ngarep nom –noman bakal ngebaki jagading pakaryan lan bakal nenthokake dalaning lan pangangen – angening bangsa Indonesia iki.

Niliki kahanan pakaryan ing negara agraris kayadene Indonesia iki ora bakal bisa ninggalake babakan tetanen utawa agrikultur. Nanging saya suwe babakan tetani kuwi saya ditinggalake karo nom – noman kita. Kabukten ing Sekolah – sekolah pertanian sing wis kekurangan murid uga ing universitas, ora akeh universitas kang nganaake jurusan pertanian. Malah – malah ana universitas gedhe sing ngraup sawernaning jurusan tetanen kayata jurusan budidaya tanduran, jurusan hama tanduran lan jurusan pangerten bab lemah dirangket dadi siji dadi jurusan agroteknologi.

Ana pemangihan sing rada sengak bab tetanen, sebabe babakan tetanen kuwi cedhak karo lemah sing kotor, panas srengee sing nyelenget, lan gambaran wong ndesa sing mlarat. Mula kuwi akeh nom – noman pada sirik karo tetanen. Sakjane budidaya tani kuwi dudu mung pakaryan sing golek kondang drajat lan pangkat nanging pepinginan tansah sinau saka kahanan sak kupeng kita sing tansah subur lan ijo royo – royo.

Ngelingi pangerten sing katulis ing dhuwur, mula bab tetanen wujude panguripane rakyat Indonesia, sing duweni manfaat linuwih angger ditemeni olehe nggarap. Ing jaman sak banjure diramalake menawa kebutuhan sandang lan pangan wis beda karo saiki, wong pada seneng panganan seger lan ora kesuwen ngenteni. Mula iku mlakune dol tinukune asile pertanian saya sumringah lan iki kudu disekuyung sakabehe perangkat sing ana kayata rekayasa mesin kanggo tetanen. Uga pemerentah sarana perangkat tatanan dagang kudu siap nyepakake aturan – aturan bab tetanen sing nyondongi karo wong tani. 

Mulane para anom ing Indonesia mangga sami gatekake menawa sakupeng kita kuwi minangka laladan kang jembar kanggo budidaya pekerti supaya kita saya pinter lan eling iki kabeh lemah lair kita. Lemah sing ijo royo – royo kanggo sangu kita lan anak putu kita kabeh supaya ora mung niru lan gampang kepincut karo samubarang sing durung mesti cocok karo pekertine bangsa iki. Mula babakan tetanen bisa kita wujudake kanggo jati dirine bangsa kita iki. Sugeng kaberkahan ing dinten Kebangkitan Nasional, utamane kanggo para mudha.

Juara Harapan II Lomba Menulis Essai Jawa - GKJW Jemaat Waru

Wasis Senoaji  & Daniel Kurniadi

Wilayah 2  – GKJW WARU